Eskola bideak

ZUMAIAKO ESKOLA BIDEAK GARATZEKO DIAGNOSTIKOA: txostena

Eskola Bideak lantaldea 2015eko urrian jaio zen ikasleen mugikortasun aktiboa eta autonomoa sustatzeko asmoz.

Azken urteotan Zumaiako Herri Eskolako (ZHE) Lubaki Guraso Elkarteko (LGE) kideek hainbatetan adierazi dute beren kezka eskola sarrera-irteeretan sortzen diren trafiko mugimenduek oinezkoengan eragiten duten segurtasun falta dela eta. Hala adierazi izan zaie udaletxeko ordezkariei hainbat bileretan, hauek guztien segurtasuna bermatu ahal izateko eskura zituzten baliabideak ipini dituztelarik. LGEtik, ordea, uste dugu aurrerapauso bat emateko ordua dela, herritarra bera ere konponbidearen parte bilakatuz eta ohitura errespetuzkoago eta osasuntsuagoak bultzatuz.

Zumaiak baldintza egokiak eskaintzen ditu ikasleen mugikortasun aktiboa sustatzeko. Bide seguruak bermatuz, ikasle gehiago hurbilduko lirateke eskolara oinez, bizikletaz, patinetean..., honek euren osasunean, mugikortasun ohituretan, autonomian... izango lukeen onurarekin.

LGEk Eusko Jaurlaritzak Osasun Sailetik ikasleen mugikortasun aktiboa sustatzeko ekintzak garatzeko dirulaguntza jaso du (Eusko Jaurlaritzak 2015eko Uztailaren 30ean aurkeztutako 3378 Agindua). Baina hasieratik uste izan dugu herri mailan jorratu beharreko gaia dela hau eta Zumaiako bi ikastetxeen eta udalaren arteko elkarlanaz emaitza integralagoak eta integratzaileagoak lortuko liratekeela. Horretarako denon partaidetza duen mahai tekniko bat sortu da LGEk hasitako bidea zabalagoa eta aberasgarriagoa izan dadin.

Zumaiak 1677 ikasle matrikulatu ditu Haur eta Lehen Hezkuntzan. Horiek herrian zehar autonomiaz eta segurtasunez mugi daitezen erraztea da Eskola Bideak proiektuaren helburua. Lehen pausua, ikastetxeetarako bideen herri mailako diagnostiko bat egitea izan da, ondorengo ekintza nagusiekin:

-Galdeketa (haurrek eskolan eta gurasoek etxean): gaur egun ikasleek eskolarako bidea nola egiten duten jakiteko, eskolara nola etortzen diren eta zein bide erabiltzen duten zehaztuz.

-Azterketa: ikastetxeetara iristeko ibilbide nagusien bide-segurtasun azterketa teknikoa.

-Diagnostiko partekatua: hezkuntza komunitate osoaren artean diagnostikoa eratu.

Orain aurrera begirako ekintzak planteatzeko momentua iritsi da. Egingo diren ekintza guztietan azken helburua kontutan izango da beti:haurren segurtasuna eta autonomia handitzea. Autonomia gehiago izatean, umeek mugikortasun modu aktiboen artean beraien aukera egin dezakete (oinez, patinetan, patinetean, bizikletaz...), eta egunero neurrizko jarduera fisikoa egingo dute. Bestalde, autonomiak ikasleen auto-estimuaren garapena indartzen du, bide-segurtasunaren eta gizabidearen aldeko jarrerak garatzen dira eta herriko inguruak ezagutzea ahalbidetzen du.

Bide horretan, eta proiektuak arrakasta izan dezan, haurrek izan behar dute egingo diren ekintzen protagonista, gurasook, eskolak eta herriak eurek seguru sentitu daitezen beharrezko baliabideak eman eta autonomia garatu dezaten animatu eta lagundu behar ditugularik.

Aurten ere, bigarren urtez jarraian, Osasun Sailak eskola bideak sustatzeko ematen duen dirulaguntza lortu dugu. Dagoenekoz martxan da proiektua lehen ekintzak egin dira, hala nola, irakasleei eta gurasoei zuzendutako formazio saioak.